தூதரக உறவில் முறிவு; கனடா தூதரக அதிகாரியை இந்தியா வெளியேற்றியது

 

இந்திய தூதரக அதிகாரியை கனடா வெளியேற்றியதை அடுத்து, கனடாவின் உயர்மட்ட தூதர் ஒருவரை இந்தியாவும் வெளியேற்றியது. காலிஸ்தான் பிரிவினைவாத தலைவர் ஹர்தீப் சிங் நிஜ்ஜார் கொல்லப்பட்டது தொடர்பாக இந்தியாவிற்கும் கனடாவிற்கும் இடையிலான தூதரக உறவுகள் மோசமடைந்துள்ள நிலையில் இந்த நடவடிக்கை எடுக்கப்பட்டுள்ளது. கனடா பிரதமர் ஜஸ்டின் ட்ரூடோவும் ஹர்தீப் சிங் நிஜ்ஜார் கொலைக்குப் பின்னணியில் இந்தியா இருக்கலாம் என்று நாடாளுமன்றத்தில் அறிக்கை வெளியிட்டார்.

இருப்பினும், ஜஸ்டின் ட்ரூடோவின் அறிக்கை அடிப்படையற்றது மற்றும் அபத்தமானது என்று இந்திய வெளியுறவு அமைச்சகம் விமர்சித்துள்ளது. தடைசெய்யப்பட்ட பயங்கரவாத அமைப்பான காலிஸ்தான் டைகர் ஃபோர்ஸ் (KTF) க்கு ஆட்களை சேர்ப்பதிலும், பயிற்சி அளிப்பதிலும் நிஜ்ஜார் தீவிரமாக ஈடுபட்டதாக இந்தியாவில் உள்ள புலனாய்வு அமைப்புகள் தெரிவித்துள்ளன.நிஜ்ஜாரின் பயங்கரவாத நடவடிக்கைகள் குறித்து இந்தியா பலமுறை கனடாவிடம் தனது கவலையை தெரிவித்திருந்ததுடன், பஞ்சாப் காவல்துறை நிஜ்ஜாரை நாடு கடத்தக் கோரியது. 2007 ஆம் ஆண்டு பஞ்சாபில் லூதியானாவில் 6 பேர் கொல்லப்பட்டது மற்றும் 42 பேர் காயமடைந்தது உள்ளிட்ட வழக்குகளில் நிஜ்ஜார் காவல்துறையால் தேடப்பட்டு வருகிறார்.