Uber Eats வாயிலாக மோசடி: கனடிய தொழிலதிபர் ரூ. 22 லட்சம் இழந்தார்

 

 

 

Uber Eats வாயிலாக நடைபெற்ற ஒரு மோசடியில், கனடிய தொழிலதிபர் ஒருவர் ரூ. 22 லட்சம் வரை இழந்துள்ளார். கனடாவின் வின்ட்சர் நகரில் 'Gyros and More' என்ற உணவகச் சங்கிலியை நடத்தி வரும் கோஸ்டா அபாட்சிடிஸ் (Costa Apatsidis), Uber Eats செயலி வாயிலாக 27,000 டாலர்களை (சுமார் ரூ. 22 லட்சம்) இழந்துள்ளார். தனது இரண்டு உணவகங்களின் வருமானம் தனது வங்கிக் கணக்கிற்கு வந்து சேரவில்லை என்பதை அவர் கவனித்ததைத் தொடர்ந்து நடத்தப்பட்ட விசாரணையின்போதே, இந்த மிகப்பெரிய மோசடி வெளிச்சத்திற்கு வந்தது. மோசடியாளர்கள், Uber Eats நிறுவனத்தால் வழங்கப்பட்ட 'டேப்லெட்' (tablet) சாதனத்தை ஊடுருவி (hack செய்து), அதில் இருந்த வங்கிக் கணக்கு விவரங்களை மாற்றியமைத்திருப்பதும், பழைய ஆர்டர் விவரங்களை அழித்திருப்பதும் விசாரணையில் தெரியவந்தது.

சுமார் ஓராண்டு காலமாகப் பணம் இழப்பு ஏற்பட்டு வந்தபோதிலும், ஆரம்பத்தில் இதுகுறித்துத் தெளிவான பதில் அளிக்கத் தயங்கிய Uber அதிகாரிகள், ஊடகங்கள் தலையிட்ட பின்னரே கணக்கில் முறைகேடுகள் நடந்திருப்பதை ஒப்புக்கொண்டனர். வின்ட்சர் காவல்துறையினர் தற்போது இந்த நிதி மோசடி குறித்து விசாரணை நடத்தி வருகின்றனர். கனடா மற்றும் அமெரிக்காவின் பல்வேறு பகுதிகளில் இதேபோன்ற மோசடிகள் நடந்திருப்பதாகப் புகார்கள் வந்துள்ள நிலையில், வணிக உரிமையாளர்கள் தங்கள் இணையப் பாதுகாப்பு (cybersecurity) விஷயத்தில் கூடுதல் விழிப்புடன் இருக்குமாறு நிபுணர்கள் எச்சரித்துள்ளனர். Uber Eats நிறுவனம் இழப்பீடு வழங்க முன்வந்தபோதிலும், அந்நிறுவனத்தின் மீதான நம்பிக்கை முழுமையாக இழக்கப்பட்டதன் காரணமாக, தனது உணவகக் கிளைகள் அனைத்திலிருந்தும் Uber Eats சேவையை நீக்க அபாட்சிடிஸ் முடிவு செய்துள்ளார்.