அமெரிக்க குடியரசுக் கட்சியினர் H-1B விசாக்களை முடக்க நகர்வு

 

 

பி.பி. செரியன்

வாஷிங்டன்: அமெரிக்காவில் H-1B விசாக்கள் வழங்குவதை மூன்று ஆண்டுகளுக்கு நிறுத்திவைக்கக் கோரி, குடியரசுக் கட்சியைச் சேர்ந்த உறுப்பினர்கள் நாடாளுமன்றத்தில் ஒரு மசோதாவை அறிமுகப்படுத்தியுள்ளனர். 'H-1B விசா முறைகேடுகளை முடிவுக்குக் கொண்டுவரும் சட்டம் - 2026' (End H-1B Visa Abuse Act of 2026) என்ற பெயரில் அறிமுகப்படுத்தப்பட்டுள்ள இந்த மசோதா நிறைவேற்றப்பட்டால், அமெரிக்காவில் உள்ள தகவல் தொழில்நுட்பத் துறையைச் சேர்ந்த இந்தியர்கள் கடுமையாகப் பாதிக்கப்படுவார்கள்.

ஆண்டுதோறும் வழங்கப்படும் விசாக்களின் எண்ணிக்கை 65,000-லிருந்து 25,000-ஆகக் குறைக்கப்படும். இந்த விசாவைப் பெறுவதற்கான குறைந்தபட்ச ஆண்டு ஊதியம் 2,00,000 டாலராகவும் (சுமார் 1.6 கோடி ரூபாய்) உயர்த்தப்படும்.

H-1B விசா வைத்திருப்பவர்கள் தங்கள் குடும்ப உறுப்பினர்களைத் தங்களுடன் அழைத்து வருவதற்கும் தடை விதிக்கப்படும்.

விசாக்களைத் தேர்வு செய்வதற்கான குலுக்கல் முறையை ரத்து செய்து, ஊதியத்தின் அடிப்படையில் விசாக்களை வழங்குவது; அத்துடன் மூன்றாம் தரப்பு முகமைகள் வாயிலாகப் பணியாளர்களை நியமிப்பதற்கும் தடை விதிப்பது ஆகிய அம்சங்களும் இந்த மசோதாவில் இடம்பெற்றுள்ளன.

அமெரிக்கப் பணியாளர்களின் வேலைவாய்ப்புகளைப் பாதுகாப்பதற்காகவே இந்த நடவடிக்கை எடுக்கப்படுவதாகக் குடியரசுக் கட்சி உறுப்பினர்கள் கூறுகின்றனர். தற்போது, அமெரிக்க நிறுவனங்களில் பணிபுரியும் வெளிநாட்டுத் திறன்சார் பணியாளர்களில் பெரும்பான்மையானோர் இந்தியர்களே ஆவர்.