Mahogany Beach விபத்து: குழந்தை கவலைக்கிடமான நிலையில் மருத்துவமனையில் அனுமதி

 

 

Calgary-இன் Mahogany Beach-இல் நிகழ்ந்த ஒரு விபத்தில் சிக்கிய குழந்தை ஒன்று, தற்போது கவலைக்கிடமான நிலையில் உள்ளது. ஞாயிற்றுக்கிழமை இரவு 7:20 மணியளவில், அக்குழந்தை நீரில் காணாமல் போனதாகத் தகவல் தெரிவிக்கப்பட்டது. சுமார் 23 அடி ஆழம் கொண்ட அந்த ஏரியின் அடியில், 43 நிமிடங்களுக்குப் பிறகு தீயணைப்பு வீரர்கள் அக்குழந்தையைக் கண்டுபிடித்தனர். உடனடியாக South Health Campus மருத்துவமனைக்குக் கொண்டு செல்லப்பட்ட அக்குழந்தை, தொடர்ந்து கவலைக்கிடமான நிலையிலேயே சிகிச்சை பெற்று வருகிறது.

இந்த விபத்தைத் தொடர்ந்து, Mahogany Beach வரும் செவ்வாய்க்கிழமை காலை வரை மூடப்பட்டிருக்கும் என்று Mahogany வீட்டு உரிமையாளர்கள் சங்கம் அறிவித்துள்ளது. உயிர்காப்பாளர்கள் (lifeguards) இல்லாத பகுதிகளில் நீந்துவது ஆபத்தானது என அதிகாரிகள் எச்சரித்துள்ளனர். ஏரிகளில் மூழ்கி உயிரிழக்கும் சம்பவங்கள் அதிகரித்து வருவதால், குழந்தைகள் நீரில் இறங்கும்போது பெரியவர்கள் மிகுந்த விழிப்புடன் இருக்க வேண்டும் என்று உயிர்காப்புச் சங்க அதிகாரிகள் அறிவுறுத்தியுள்ளனர். Alberta மாகாணத்தில் நிகழும் நீரில் மூழ்கிய உயிரிழப்புகளில் பெரும்பாலானவை, மே மற்றும் செப்டம்பர் மாதங்களுக்கு இடைப்பட்ட காலத்திலேயே ஏற்படுகின்றன.