உலகக் கோப்பை உற்சாகமும் பாதுகாப்பும் இணைகின்றன; டொராண்டோ இலவச ஆணுறைகளை விநியோகிக்கிறது

 

 

2026 FIFA உலகக் கோப்பையை நடத்தத் தயாராகி வரும் டொராண்டோ நகரம், விளையாட்டின் உற்சாகத்தோடு பொது சுகாதாரத்தையும் பாதுகாக்கும் வகையில் ஒரு புதிய முன்னெடுப்பைத் தொடங்கியுள்ளது. உலகக் கோப்பை நிகழ்வின் ஒரு பகுதியாக நகரத்திற்கு வருகை தரவுள்ள லட்சக்கணக்கான பார்வையாளர்களுக்கு, கால்பந்து சார்ந்த ஆறு வெவ்வேறு வடிவங்களில் இலவச ஆணுறைகளை விநியோகிக்க முடிவு செய்யப்பட்டுள்ளது. இவை "இந்த 'ஷாட்களை' (Shots) தடுத்து நிறுத்துங்கள்" (Block These Shots) மற்றும் "எப்பேர்ப்பட்ட முடிவு!" (What a Finish!) போன்ற கலகலப்பான வாசகங்கள் அடங்கிய உறைகளில் வைத்து வழங்கப்படும்.

டொராண்டோவில் உள்ள நான்கு முக்கிய பாலியல் சுகாதார மையங்கள் மற்றும் தேர்ந்தெடுக்கப்பட்ட சமூக மையங்களில் இவை இலவசமாகக் கிடைக்கும் என்று அதிகாரிகள் தெரிவித்தனர். உலகத்தரம் வாய்ந்த விளையாட்டு நிகழ்வுகளின் போது நகரங்களுக்கு வரும் பார்வையாளர்களின் எண்ணிக்கை அதிகரிப்பதையும், அதன் விளைவாகப் பாலியல் ரீதியாகப் பரவும் நோய்கள் பரவுவதற்கான சாத்தியக்கூறுகளையும் கருத்தில் கொண்டே இந்த நடவடிக்கை எடுக்கப்பட்டுள்ளது. 'CondomTO' எனும் பிரச்சாரத்தின் மூலம், பாதுகாப்பான பாலியல் பழக்கங்களை ஊக்குவிப்பதையும், HIV உள்ளிட்ட நோய்த்தொற்றுகளைத் தடுப்பதையும் சுகாதாரத் துறை நோக்கமாகக் கொண்டுள்ளது.

டொராண்டோ பொது சுகாதாரத் துறை, இதற்கு முன்னரும் 2014-ஆம் ஆண்டின் 'World Pride' நிகழ்வின் போதும், 2015-ஆம் ஆண்டின் 'Pan American Games' நிகழ்வின் போதும் இதேபோன்ற முறையில் ஆணுறைகளை விநியோகித்துள்ளது. ஜூன் மற்றும் ஜூலை மாதங்களில் டொராண்டோவில் நடைபெறவுள்ள ஆறு உலகக் கோப்பை போட்டிகளுக்கு முன்னதாகவே, சுமார் ஐந்து லட்சம் ஆணுறைகளை விநியோகிப்பதே தற்போதைய திட்டமாகும்.