கனடாவுக்குள் நுழைய முயன்றபோது 60 கிலோ கொக்கைனுடன் இந்தியர் கைது

 

 

மிச்சிகன்: அமெரிக்காவிலிருந்து கனடாவுக்கு வாகனத்தில் பயணித்தபோது, சுமார் 60.5 கிலோ கொக்கைனைக் கடத்த முயன்றதாகக் கூறப்படும் இந்தியரான சந்தன் தயால் (27) என்பவர் கைது செய்யப்பட்டுள்ளார்.

இந்தச் சம்பவம் ஜூன் 11 அன்று அதிகாலை நேரத்தில் நிகழ்ந்தது. மிச்சிகனில் உள்ள ப்ளூ வாட்டர் பிரிட்ஜ் எல்லைச் சோதனைச் சாவடியில் வாகனத்தை சோதனைக்காக நிறுத்தியபோது, வாகனத்திற்குள் இருந்த இரண்டு பெட்டிகள் குறித்து அமெரிக்க சுங்க மற்றும் எல்லைப் பாதுகாப்பு (CBP) அதிகாரிகளுக்குச் சந்தேகம் ஏற்பட்டது.

விஸ்கான்சினிலிருந்து கனடாவின் பிராம்ப்டனுக்குக் கொண்டு செல்லப்படும் மரப்பலகைகள் மற்றும் சீஸ் பவுடர் ஆகியவை அந்தப் பெட்டிகளில் இருப்பதாக சந்தன் தயால் அதிகாரிகளிடம் கூறியதாகத் தெரிகிறது. இருப்பினும், விரிவான சோதனையில் அந்தப் பெட்டிகளுக்குள் வெற்றிடமாக அடைக்கப்பட்ட 55 கொக்கைன் பொட்டலங்கள் இருப்பது தெரியவந்தது.

முதல் பெட்டியில் சுமார் 27.47 கிலோகிராம் எடையுள்ள 25 பொட்டலங்களும், இரண்டாவது பெட்டியில் சுமார் 33.03 கிலோகிராம் எடையுள்ள 30 பொட்டலங்களும் இருந்தன. கைப்பற்றப்பட்ட கொக்கைனின் மொத்த அளவு சுமார் 60.5 கிலோகிராம் என அதிகாரிகள் தெரிவித்தனர்.

சந்தன் தயால், தனக்கு அந்த போதைப்பொருள் பற்றி எதுவும் தெரியாது என்றும், வாகனம் புறப்படுவதற்கு முன்பு நிறுவனம் அதை மூடியதை தான் பார்த்ததாகவும் புலனாய்வாளர்களிடம் கூறியதாகத் தெரிகிறது. அதைத் தொடர்ந்து மேரிஸ்வில் காவல் துறையின் கே-9 நாய் நடத்திய சோதனையில், போதைப்பொருள் இருப்பது உறுதி செய்யப்பட்டது.

கைது செய்யப்பட்ட சந்தன் தயால், தற்போது செயின்ட் கிளேர் கவுண்டி சிறையில் காவலில் வைக்கப்பட்டுள்ளார். இந்தச் சம்பவம் குறித்த மேலதிக விசாரணை நடைபெற்று வருவதாக அதிகாரிகள் தெரிவித்தனர்.