விமானத்தின் ஜன்னல் உடைந்ததால் வெளியே இழுக்கப்பட்ட பயணி: நூலிழையில் உயிர் தப்பினார்

 

 

 

விமானத்தின் ஜன்னல் உடைந்தபோது வெளியே இழுக்கப்பட்ட பயணி ஒருவர் நூலிழையில் உயிர் தப்பினார். கிரீஸிலிருந்து ஜெர்மனிக்குச் சென்றுகொண்டிருந்த விமானம் ஒன்றில் இந்தச் சம்பவம் நிகழ்ந்தது. விமானத்திற்கு உள்ளேயும் வெளியேயும் இருந்த காற்று அழுத்த வேறுபாடு காரணமாக, பயணி ஒருவரின் உடல் பாதியளவு ஜன்னல் வழியாக வெளியே இழுக்கப்பட்டது. ரியான்ஏர் (Ryanair) நிறுவனத்தின் துணை நிறுவனமான மால்டா ஏர் (Malta Air) விமானத்தில் இந்த அதிர்ச்சிகரமான சம்பவம் நடந்தது.

வெள்ளிக்கிழமை காலை, போயிங் 737 ரக விமானம் ஒன்று கிரீஸின் தெசலோனிகியிலிருந்து ஜெர்மனியின் மெம்மிங்கனுக்கு 15,000 அடி உயரத்தில் பறந்து கொண்டிருந்தது. விபத்து ஏற்பட்டதைத் தொடர்ந்து, விமானம் உடனடியாக தெசலோனிகி விமான நிலையத்திற்குத் திருப்பி விடப்பட்டது. விபத்தில் சிக்கிய 61 வயதுடைய பயணி லேசான காயங்களுடன் உயிர் தப்பினார்; அவருக்குக் கழுத்து மற்றும் தோள்பட்டையில் காயங்கள் ஏற்பட்டன. அவர் தற்போது மருத்துவமனையில் சிகிச்சை பெற்று வருகிறார்.

விமானம் புறப்பட்ட ஆறு நிமிடங்களிலேயே பலத்த சத்தம் கேட்டதாகப் பயணிகள் தெரிவித்தனர். அந்தச் சத்தம் டயர் வெடிப்பது போல இருந்ததாகக் கூறினர். உடனடியாக ஆக்சிஜன் முகமூடிகள் கீழே விழுந்தன, விமானம் வேகமாகத் தாழ்வாக இறங்கத் தொடங்கியது. பயணிகள் பீதியில் அலறினர். ஜன்னல் உடைந்தவுடன் விமானிகள் விமானத்தை 6,000 அடி உயரத்திற்குக் குறைத்து, ஒரு மணி நேரத்திற்குள் பாதுகாப்பாக அவசரத் தரையிறக்கம் செய்தனர்.

என்ஜின் கோளாறு காரணமாக ஜன்னல் உடைந்ததா அல்லது ஏதேனும் பொருள் விமானத்தின் மீது மோதியதால் உடைந்ததா என்பது தெளிவாகத் தெரியவில்லை. அமெரிக்காவின் தேசிய போக்குவரத்து பாதுகாப்பு வாரியம் மற்றும் கிரேக்க விமானப் போக்குவரத்து அதிகாரிகள் இச்சம்பவம் குறித்து விசாரணை நடத்தி வருகின்றனர். அந்த விமானம் தற்போது தெசலோனிகியில் தரையிறக்கப்பட்டு நிறுத்தப்பட்டுள்ளது.