டிஜிட்டல் கண்காணிப்பு கருவியைப் பயன்படுத்தி சொகுசு கார்களைத் திருடிய நபர் மீது ஹால்டன் காவல்துறை குற்றச்சாட்டு

 

 

கிரேட்டர் டொராண்டோ மற்றும் ஹாமில்டன் பகுதிகளில் டிஜிட்டல் கண்காணிப்பு கருவிகளைப் பயன்படுத்தி சொகுசு கார்களைத் திருடியதாக சந்தேக நபர் ஒருவரை ஹால்டன் பிராந்திய காவல்துறை கைது செய்துள்ளது. கியூபெக்கின் செயின்ட் ஜெரோம் பகுதியைச் சேர்ந்த டேரல் டான்ஸ் (Darrell Dawns) என்பவர் மீது, 14 உயர்தர டொயோட்டா மற்றும் லெக்ஸஸ் வாகனங்களைத் திருடியது மற்றும் திருட முயன்றது உள்ளிட்ட 29 வாகனத் திருட்டு குற்றச்சாட்டுகள் பதிவு செய்யப்பட்டுள்ளன.

இதேபோன்ற குற்றங்களுக்காக ஏற்கனவே பிணையில் விடுவிக்கப்பட்டிருந்த இந்த நபர், அதே பாணியில் தனது திருட்டுச் செயல்களைத் தொடர்ந்து வந்ததாக புலனாய்வாளர்கள் தெரிவித்தனர்.

ஓக்வில்லி (Oakville) பகுதியைச் சேர்ந்த ஒருவர் தனது வாகனத்தில் அறிமுகமில்லாத ‘Acuteg’ கண்காணிப்பு கருவியைக் கண்டறிந்து காவல்துறையிடம் புகார் அளித்ததையடுத்து, கடந்த ஏப்ரல் மாதம் இந்த விசாரணை தொடங்கியது. ஷாப்பிங் மால்கள் மற்றும் ஹோட்டல் வாகன நிறுத்துமிடங்கள் போன்ற பரபரப்பான பொது இடங்களில் நிறுத்தப்பட்டிருந்த விலையுயர்ந்த வாகனங்களையே இந்த நபர் முக்கியமாக குறிவைத்தார்.

இந்த நபர் ஜிபிஎஸ் (GPS) அல்லது புளூடூத் (Bluetooth) கண்காணிப்பு கருவிகளை வாகன ஓட்டிகளின் கண்ணில் படாதவாறு, வாகனத்தின் நம்பர் பிளேட்டிற்குப் பின்னால், பக்கவாட்டு கண்ணாடியின் உள்ளே, சக்கரங்களுக்கு அருகிலுள்ள பகுதிகளில் (wheel wells) அல்லது பம்பர்களில் ஒட்டி வைப்பார். பின்னர், ஒரு மொபைல் செயலி மூலம் வாகனத்தின் நடமாட்டத்தைக் கண்காணித்து, பாதுகாப்பு கேமராக்கள் அல்லது சாட்சிகள் இல்லாத ஒதுக்குப்புறமான இடத்தில் வாகனம் நிறுத்தப்பட்டிருக்கும்போது அதைத் திருடிச் செல்வார்.

பெரிய குற்றக் கும்பல்கள் இத்தகைய தொழில்நுட்பத்தைப் பயன்படுத்துவதால் பொதுமக்கள் விழிப்புடன் இருக்குமாறு ஹால்டன் காவல்துறை எச்சரித்துள்ளது.

வாகன நிறுத்துமிடங்களிலிருந்து வாகனங்களை எடுத்துச் செல்வதற்கு முன் அவற்றைச் சரிபார்க்கும் பழக்கத்தை ஏற்படுத்திக்கொள்ளுமாறும், அறிமுகமில்லாத கண்காணிப்பு கருவிகள் ஏதேனும் தென்பட்டால் அவற்றை நீக்காமல் உடனடியாக காவல்துறையிடம் தெரிவிக்குமாறும் மக்கள் கேட்டுக்கொள்ளப்பட்டனர். அத்தகைய கருவிகளில் உள்ள டிஜிட்டல் ஆதாரங்கள் மற்றும் கைரேகைகள் குற்றவாளிகளை விரைவாக அடையாளம் காண உதவும் என்பதால், அவற்றை தாங்களாகவே அகற்ற முயற்சிக்கக்கூடாது என்றும் காவல்துறை அறிவுறுத்தியது. இவ்வழக்கு தொடர்பான விசாரணை இன்னும் தொடர்ந்து நடைபெற்று வருகிறது.