கனடாவின் சுகாதார அமைப்பு நெருக்கடியில்: ஆய்வறிக்கை வெளியீடு

 

 

சமீபத்திய தேசிய ஆய்வின் முடிவுகளின்படி, கனடாவின் பொது சுகாதார அமைப்பு கடுமையான நெருக்கடியை எதிர்கொண்டுள்ளது. தங்கள் மாகாணங்களில் உள்ள சுகாதார அமைப்பு மிகவும் மோசமான நிலையில் இருப்பதாக அந்நாட்டு மக்களில் 63 சதவீதம் பேர் கருதுகின்றனர். 'அபாகஸ் டேட்டா அண்ட் ரிசர்ச் கோ' (Abacus Data and Research Co.) நிறுவனத்தால் இந்த ஆய்வு நடத்தப்பட்டது. மருத்துவர்கள் மற்றும் செவிலியர்களின் பற்றாக்குறை மற்றும் மருத்துவமனைகளில் நீண்ட நேரம் காத்திருக்க வேண்டிய நிலை ஆகியவை மக்களின் மிகப்பெரிய கவலைகளாக உள்ளதாக இந்த ஆய்வு காட்டுகிறது. கடந்த ஐந்து ஆண்டுகளில் மருத்துவ வசதிகள் மோசமடைந்துள்ளதாக சுமார் 55 சதவீத மக்கள் தெரிவித்துள்ளனர்.
மருத்துவத் துறையில் நிலவும் இந்த நீண்ட காத்திருப்பு நேரத்தால், லட்சக்கணக்கான நோயாளிகள் அவசர சிகிச்சைப் பிரிவுகளில் பல மணிநேரம் அவதிப்படுகின்றனர். 'கனடிய சுகாதாரத் தகவல் நிறுவனம்' (Canadian Institute for Health Information) வெளியிட்ட அறிக்கையின்படி, அவசர சிகிச்சைப் பிரிவுக்குச் செல்லும் பத்து பேரில் ஒருவர், அடுத்தகட்ட சிகிச்சையைப் பெற இரண்டு நாட்களுக்கும் மேலாகக் காத்திருக்க வேண்டியுள்ளது. நோயாளிகளின் எண்ணிக்கை அதிகரிப்பு மற்றும் பணியாளர் பற்றாக்குறை காரணமாக, ஓராண்டில் சுமார் 12 லட்சம் பேர் பரிசோதனைகளை முழுமையாக மேற்கொள்ளாமலேயே திரும்பிச் சென்றுள்ளனர். அதிகாரத்துவ நடைமுறைகள் மற்றும் நிர்வாகக் குறைபாடுகள் இந்தச் சரிவுக்கு முக்கிய காரணங்களாக உள்ளன என்று 12 சதவீதத்தினர் சுட்டிக்காட்டியுள்ளனர்.
சுகாதார அமைப்பின் மீது பரவலான அதிருப்தி நிலவினாலும், பொது நிதியுதவி பெறும் சுகாதார மாதிரியின் மீது கனடியர்கள் இன்னும் நம்பிக்கை கொண்டுள்ளனர். நிதி வசதியை விட தனிநபரின் தேவைகளுக்கு முன்னுரிமை அளிக்கும் 'இலவச சுகாதார சேவை' என்பதே நாட்டின் அடிப்படை கொள்கை என்று 85 சதவீதத்தினர் கருத்து தெரிவித்துள்ளனர். தனியார் துறை நுழைந்தால் சிகிச்சைக்கான செலவு அதிகரிக்கும் என்றும், சாதாரண மக்களுக்குச் சேவைகள் கிடைக்காத நிலை ஏற்படும் என்றும் பெரும்பாலான மக்கள் கவலை தெரிவிக்கின்றனர். தற்போதைய அமைப்பை மறுசீரமைத்து மேம்படுத்த வேண்டும் என்று மக்கள் வலியுறுத்துகின்றனர்.