மாதம் 14,000 கனடிய டாலர் சம்பளம்! உலகம் முழுவதும் ஐஸ்கிரீம் சுவைக்கலாம் - 'கனவு வேலையை' வழங்குகிறார் ஸ்னூப் டாக்

 

 

பல்வேறு நாடுகளுக்குப் பயணம் செய்து ஐஸ்கிரீம் சாப்பிடும் வாய்ப்பை யார் தான் மறுப்பார்கள்? அதோடு மாதம் பல லட்சம் ரூபாய் சம்பளமும் கிடைத்தால்? இதை நம்புவது கடினமாக இருக்கலாம், ஆனால் இது உண்மைதான். பிரபல அமெரிக்க ராப் பாடகரும் தொழிலதிபருமான ஸ்னூப் டாக் (Snoop Dogg), தனது ஐஸ்கிரீம் பிராண்டிற்காக 'சர்வதேச ஐஸ்கிரீம் சுவைப்பவர்' (International Ice Cream Taster) ஒருவரைத் தேடி வருகிறார். இதற்கான சம்பளம் மாதம் 10,000 அமெரிக்க டாலர்கள் ஆகும். சாதாரண மக்களால் கற்பனை கூட செய்து பார்க்க முடியாத இந்த 'இனிமையான வேலை' குறித்த செய்தி, தற்போது சமூக ஊடகங்களில் வைரலாகி வருகிறது.

ஸ்னூப் டாக் தனது மகன் கார்டெல் பிராடஸுடன் (Cordell Broadus) இணைந்து 2023-ல் தொடங்கிய 'டாக்டர் பாம்பே' (Doctor Bombay) என்ற பிரபலமான ஐஸ்கிரீம் பிராண்டிற்காகவே இந்த அரிய பணி வாய்ப்பு உருவாக்கப்பட்டுள்ளது. இந்தச் சிறப்பான வாய்ப்பு குறித்து ஸ்னூப் டாக் டிக்டாக் (TikTok) வழியாக உலகிற்குத் தெரிவித்துள்ளார். உலகின் பல்வேறு பகுதிகளுக்குப் பயணம் செய்து, புதிய ஐஸ்கிரீம் சுவைகள் மற்றும் சந்தைப்போக்குகளைக் (trends) கண்டறிந்து நிறுவனத்திற்குத் தெரிவிப்பதே இந்தப் பணியின் முக்கிய அம்சமாகும். 'Deal' எனும் உலகளாவிய வேலைவாய்ப்புத் தளம் மூலம் இதற்கான விண்ணப்பங்கள் வரவேற்கப்படுகின்றன. பாஸ்போர்ட் வைத்திருக்கும் மற்றும் ஐஸ்கிரீம் மீது மிகுந்த ஆர்வம் கொண்ட உலகின் எந்தப் பகுதியைச் சேர்ந்தவரும் இதற்கு விண்ணப்பிக்கலாம். சமையல் கலை சார்ந்த பெரிய பட்டங்களை விட, சுவைகளை அறிந்துகொள்ளும் ஆர்வமும், சந்தைப்போக்குகளைக் கண்டறியும் திறனுமே இந்நிறுவனத்தால் முக்கியமாக எதிர்பார்க்கப்படுகிறது. தேர்ந்தெடுக்கப்படும் நபரை ஸ்னூப் டாக் நேரில் அழைத்து, தனது வாழ்த்துகளைத் தெரிவிப்பார் என்றும் நிறுவனம் கூறியுள்ளது.